Në Akademinë e Sigurisë, u organizua një ceremoni përkujtimore, ku morën pjesë zëvendësministri i Brendshëm Andi Mahila, përfaqësues të institucioneve të ndryshme vendore, drejtues të lartë të Policisë së Shtetit, përfaqësues të misioneve ndërkombëtare që mbështesin punën e Policisë, si dhe familjarë dhe të afërm të punonjësve të Policisë që humbën jetën në krye të detyrës. Në fjalën e tij, Zëvendësdrejtori i Përgjithshëm i Policisë së Shtetit, Drejtues i Lartë Sokol Bizhga, duke folur në emër të Drejtorit të Përgjithshëm të Policisë, Ilir Proda, dhe të gjithë organizatës së Policisë së Shtetit, shprehu mirënjohje për sakrificën dhe angazhimin e punonjësve të Policisë që humbën jetën gjatë luftës kundër krimit.