Një operacion i madh ndërkombëtar kundër trafikut të drogës ka arrestuar 52 persona në Itali dhe Shqipëri. Aksioni, i quajtur “Ura”, u zhvillua nga Drejtoria e Hetimeve Antimafia në Bari dhe SPAK në Tiranë, në bashkëpunim me Interpolin, Zyrën e Ekspertit të Sigurisë në Tiranë dhe Policinë Shqiptare, nën koordinimin e Eurojust në Hagë dhe Drejtorisë Kombëtare Antimafia dhe Antiterrorizëm në Romë. Operacioni përfshiu edhe sekuestrimin e aseteve të luajtshme dhe të paluajtshme në Shqipëri dhe Itali, me një vlerë prej disa milionë eurosh. Të arrestuarit akuzohen për përfshirje në trafik ndërkombëtar të sasive të mëdha të kokainës dhe heroinës, pastrim parash dhe shpërdorim detyre. Në listën e të dyshuarve përfshihen edhe avokatë, biznesmenë, zyrtarë policie dhe persona me precedentë penalë.