Lideri i Koresë së Veriut, Kim Jong Un, ka kërkuar “rritje drastike” të prodhimit të raketave gjatë vizitave të tij në fabrikat e armëve, raportuan të hënën mediat shtetërore, pak ditë para se Shtetet e Bashkuara dhe Koreja e Jugut t’i nisin ushtrimet e përbashkëta ushtarake. Kim i vizitoi fabrikat të premten dhe të shtunën, pak pasi kishte bërë thirrje për përshpejtimin e përgatitjeve për luftë gjatë një takimi të rëndësishëm me ushtrinë javën e kaluar. Inspektimet dyditore të Kimit u bënë në fabrikat për prodhimin e raketave taktike, hedhësve të raketave dhe predhave të kalibrit të lartë, si dhe për prodhimin e automjeteve të blinduara luftarake, raportoi Agjencia Qendrore e Lajmeve e Koresë. Gjatë vizitës në fabrikën e raketave taktike, Kim “u shpreh shumë i kënaqur”, pasi fabrika i ka “përsosur çështjet shkencore dhe teknologjike të ngritura gjatë prodhimit”, si dhe kërkoi vazhdimin e modernizimit të armëve. “Ai e caktoi një synim të rëndësishëm për rritjen drastike të kapacitetit ekzistues të prodhimit të raketave dhe e nënvizoi rolin e fabrikës për përshpejtimin e përgatitjeve për luftë”, tha agjencia. Kimi e theksoi nevojën “për të siguruar rritjen e prodhimit të predhave, po ashtu”, si dhe personalisht e voziti një automjet të blinduar luftarak, sipas agjencisë së lajmeve.