Ka përfunduar procesi i votimit për zgjedhjet e përgjithshme parlamentare në të gjithë vendin. Në disa qendra votimi aty ku ka pasur zgjedhës në pritje për të votuar, votimi ka vazhduar edhe pak minuta pas orës 19:00 duke u dhënë mundësinë të gjithëve që të shprehin vullnetin e tyre. Më pas komisionet janë marrë me mbylljen dhe vulosjen e kutive të votimit duke i dërguar më pas në qendrat e numërimit të votave pranë KZAZ-ve përkatëse. Edhe kreu i KQZ-së Ilirjan Celibashi e konsideroi të mbyllur procesin pas mbylljes së orarit zyrtar. Celibashi tha se numërimi do nisë menjëherë dhe se brenda 48 orësh do të ketë shpallje të rezultatit për partitë dhe koalicionet. Gjithsej janë për t’u numëruar votat e 5199 kutive të votimit, që përfaqësojnë po kaq qendra votimi ku ushtruan të drejtën qytetarët shqiptarë.