Komisioni Europian paralajmëroi se gjatë muajt mars do të miratojë propozimin legjislativ për atë që tashmë është emërtuar si “COVID-pasaportë”, e që në BE e quajnë “certifikatë e vaksinimit” kundër koronavirusit. Zëdhënësi i Komisionit Europian, Eric Mamer, tha se për të filluar zbatimin në praktikë të këtij propozimi do të duhen të paktën tre muaj.Ideja është që personat e imunizuar të kenë një “certifikatë vaksinimi” në formë elektronike dhe kjo do t’ua lehtësojë udhëtimet. BE, deri tani ka këmbëngulur se fjala është për “certifikata” që do të përdoren vetëm për “çështje shëndetësore”, e jo si “dokumente udhëtimi”.Megjithatë, Komisioni e pranon se qëllimi është të lehtësohet udhëtimi në kohën kur po bëhen përpjekje për rimëkëmbje ekonomike, sidomos në sektorin e udhëtimeve dhe turizmit. Mamer, i pyetur se a do të jenë këto vërtetime për vaksinim vetëm për përdorime në sistemin shëndetësor apo edhe për udhëtime, tha se ato “në bazë të gjendjes shëndetësore, do të lehtësojnë udhëtimin”.Komisioni Europian për cdo rast nuk ka fuqi të vendosë për këtë çështje, por vetëm të propozojë. Paskësaj, vendet anëtare, së bashku apo secila në mënyrë individuale, mund të vendosin se si t’i përdorin pasaportat në fjalë. Mendohet se kjo ide do të krijojë ndasi brenda Bashkimit Europian, për shkak se zbatimi i saj mund të shkaktojë diskriminim cka përbën shkelje të ligjeve të BE-së.