Pasi tentativa e parë ra në vesh të shurdhër, pesë anëtarët e këshillit për rregulloren, mandatet dhe imunitetit kërkojnë sërish nga kryeparlamentari Niko Peleshi që të thërrasë mbledhjen e këshillit ditën e premte në orën 11:00 për të çuar përpara shqyrtimin e kërkesës së SPAK për t’i hequr numrit dy të qeverisë imunitetin. Deputetët Gazment Bardhi, Oerd Bylykbashi, Elda Hoti, Gent Strazimiri dhe Saimir Korreshi argumentojnë se precedentët parlamentar kanë treguar se 48 deri në 72 orë kanë qënë të mjaftueshme për t’u njohur me aktet dhe për t’u përgatitur për paraqitjen e mbrojtjes. Gjithashtu në shkresën zyrtare depozituar në Kuvend thuhet se është vërtetuar me metoda speciale se Belinda Balluku po intimidon dëshmitarët dhe po prish provat. Në këto kushte duhet që Kuvendi ta konsiderojë prioritare këtë çështje.