Prokuroria e Tiranës ka vënë masën e sekuestros për 18 pasuri të paluajtshme, llogari bankare dhe automjete luksose që dyshon se kanë si burim të tyre aktivitetin e pastrimit të parave të trafikut të drogës. Pasuritë, që arrijnë vlera disa milionë euro rezultojnë në emër të shtetasit Kristian Koni, njohur edhe me emrin Olsi Meta. Ky i fundit, siç njofton prokuroria e Tiranës, rezulton i dënuar për trafik droge në Itali. Pasuritë e patundshme që janë sekuestruarar përfshijnë prona në zonën e Tiranës, atë të Bathores, në Farkë dhe në fshatin Marikaj. Hetimet kanë zbuluar llogari bankare dhe automjete luksoze në emër të Kristian Konit, alias Olsi Meta, si dhe një kompani me emrin Kriol.al. Një pjesë e këtyre pronave, që prokuroria dyshon se kanë për burim pastrimin e parave të trafikut të drogës, Kristian Koni e kishte kaluar në emër të nënës së tij pensioniste. Prokuroria thotë se masa e sekuestrimit është ndërmarrë për të ndaluar tjetërsimin e tyre dhe ekzekutimin e një vendimi të mundshëm gjyqësor për konfiskim.