Pas dorëheqjes dhe heqjes së uniformave në shenjë proteste, tashmë oficerët e Policisë në veri të kosovës kanë nisur të dorëzojnë armët e shërbimit në Stacionin Policor të Zveçanit. Dorëzimi i armëve dhe fletëdorëheqjeve erdhi pas përfundimit të protestës së serbëve në sheshin “Car Lazar”-i të organizuar nga Lista Serbe. Policia e Kosovës ndërkohë, përmes një deklarate për media, ka thënë se dorëheqje ka patur edhe në institucione të tjera në veri të kosovës. Po ashtu, ajo ka bërë të ditur se ka kapacitetet për menaxhimin e situatës dhe rrethanave dhe se të gjitha veprimet në vijim do të ndërmerren konform autorizimeve ligjore dhe kushtetuese. Shumë analistë kanë shprehur shqetësim për mbetjen e veriut të Kosovës pa garantues rendi dhe ligji tani që policët serbë kanë dhënë dorëheqjen. Vetë presidenti serb, Aleksander Vucic, tha një natë më parë se policia e kosovës nuk duhet të hyjë në veri pasi kjo nuk është në përputhje me marrëveshjen e brukselit dhe vullnetin e popullatës atje. Nëse kjo do të ndodhte, vucic paralajmëroi përshkallëzim.