Dhuna nuk është thjesht një term. As një fenomen nga i cili vuajnë shumë, apo që policia duhet të marrë masa. Dhuna shfaqet në shumë trajta. Asnjë grup nuk është i paprekshëm dhe dhuna mund të jetë pjesë e jetës së kujtdo. Por, dhuna digjitale ndaj vajzave dhe grave ndeshet gjithmonë e më shpesh te adoleshentët dhe të rinjtë dhe mund të jetë e kombinuar ose jo me dhunën fizike. Teknologjia, rrjetet sociale dhe interneti janë mjedise ku të rinjtë ndihen komodë, por gjithashtu krijojnë mundësi për mbikontroll dhe abuzim. Ndër shenjat që tregojnë dhunë digjitale janë kontrolli i telefonit të partnerit, spiunimi i telefonit, censurimi i fotove dhe postimeve, kërkimi i lokacionit, detyrimi për të dërguar foto intime, kontrolli i rrjeteve sociale, marrja e fjalëkalimeve të rrjeteve sociale dhe kërkesa për përgjigje të menjëhershme. Por me teknologjinë ka evoluar gjithçka, mbi të gjitha abuzimi. Dhuna dixhitale është gjerësisht e pranishme në shoqërinë tonë, shkakton dëme të mëdha psikologjike dhe shërben shpesh si një pikëfillimi për dhunën fizike.