Lufta brenda Partisë Demokratike, duket se ka kaluar në tjetër nivel. Nga përballjet në tryeza, parlament dhe studio mediatike, përkrahësit e Lulzim Bashës po e vijojnë këtë betejë edhe në aplikacionet e komunikimit. Së fundmi, Endri Hasa, pas një heshtje të madhe po rikthehet me rikthimin e Lulzim Bashës, duke përmbushur detyrën e Sekretarit për Koordinimin Dixhital. Burime bëjnë me dije se Hasa ka ndërhyrë në grupin e Whatsapp të krijuar për grupin parlamentar të PD, duke fshirë njoftimin e Gazment Bardhit për mbledhjen e radhës të grupit, që pritet të mbahet të martën në orën 12. Për të mos u mjaftuar me kaq, Hasa I ka hequr mundësinë e komunikimit në grup Gazment Bardhit dhe deputetëve. Ky veprim duket se ka nxitur shtimin e pakënaqësisë në grupin e deputetëve demokratë, një pjesë prej të cilëve pas këtij veprimi të Sekretarit për Koordinimin Dixhital, njëherësh administrator I këtij grupi, kanë zgjedhur që të largohen nga grupi. Sipas deputetëve ky është një veprim qesharak, pasi ata mund të hapin lehtësisht një grup tjetër.