Presidenti ukrainas Volodymyr Zelenski tha se garancitë e sigurisë për Kievin për t'i dhënë fund luftës së Rusisë do të ishin efikase vetëm nëse Shtetet e Bashkuara i ofrojnë ato dhe se ai shpresonte të takohej me Presidentin e zgjedhur të SHBA-së, Donald Trump, shumë shpejt pas inaugurimit të tij. Në një intervistë me podkasterin amerikan Lex Fridman, Zelenski tha se ukrainasit po mbështeten tek Trump për ta detyruar Moskën t'i japë fund luftës së saj dhe se Rusia do të përshkallëzonte situatën në Evropë nëse Uashingtoni do të largohej nga aleanca ushtarake e Organizatës së Traktatit të Atlantikut të Veriut, NATO. Pothuajse tre vjet pas pushtimit të Rusisë, zgjedhja e Trump, i cili kthehet në Shtëpinë e Bardhë më 20 janar, ka ndezur shpresën për një zgjidhje diplomatike për të ndaluar luftën, por gjithashtu frikën në Kiev se një paqe e shpejtë mund të ketë një çmim të lartë.