Avionët luftarakë grekë u ngritën të dielën për të shoqëruar një avion të kompanisë Ryanair nga Polonia në Greqi me 190 persona në bord pasi një alarm për bombë u raportua nga autoritetet. Dy avionë luftarakë F-16 e shoqëruan avionin që u nis nga Katovica në Poloni, me destinacion Athinën, kur ai hyri në hapësirë ajrore greke nga Maqedonia e veriut. Boeingu 737 më herët ishte shoqëruar nga avionët ushtarakë hungarezë – thanë zyrtarët. Avioni më në fund u ul në një zonë të izoluar në aeroportin ndërkombëtar të Athinës, pak para orës 16.00 me orën lokale, një vonesë prej rreth dy orësh e gjysmë. “Pasagjerët u evakuuan dhe iu nënshtruan kontrolleve”, tha policia greke e cila edhe saktësoi se kishte 190 persona në bord, përfshirë ekuipazhin. Avioni u kontrollua pas pasagjerëve. Ndërsa avioni po i afrohej Athinës ai u devijua, duke kaluar mbi det, si masë parandaluese. Zyrtarët polakë thanë se kishin marrë një njoftim përmes telefonit ndërsa avioni ishte duke fluturuar mbi sllovaki. Pasi avioni u nis në fluturim, pati një telefonatë në qendrën e informacionit të aeroportit në lidhje me praninë e mundshme në bord të një mjeti shpërthyes – thanë ata. Kjo bëri që menjëherë të kontaktoheshin qendrat e kontrollit të trafikut ajror, që më pas edhe drejtuan pilotët.