Punonjësit e doganës greke do të zhvillojnë një greve 24 orëshe dhe për pasojë puna në doganën e Kakavijës do të pezullohet gjatë gjithë ditës së martë nga ora 7 deri në orën 7 të ditës së mërkurë me orën lokale. Njoftimi është bërë nga drejtoria Vendore e Kufirit dhe Migracionit në Gjirokastër, pas sqarimit të dhënë nga autoritetet e policisë greke. “Sqarojmë se gjatë këtij harku kohor, si në hyrje dhe në dalje të doganës greke, nuk do të lejohet kalimi i automjeteve si motoçikleta, autovetura, furgonë që transportojnë qytetarë dhe kamionët që transportojnë mallra. Përjashtim do të ketë vetëm për udhëtarët këmbësorë, kamionët që transportojnë mallra ushqimore që ruhen në kushte frigoriferike, kamionët që transportojnë kafshët e gjalla dhe automjetet për raste emergjente shëndetësore apo raste vdekjesh”, thuhet në njoftimin e polivisë së kufitit dhe migracionit. Autoritetet policore u kane bërë thirrje të gjithë qytetarëve që duan të udhëtojnë drejt Greqisë, që gjatë këtij harku kohor, të shmangin udhëtimin në drejtim të kësaj pike kalimi.