Pakistani testoi një raketë balistike këtë të shtunë. Testimi vjen në një kohë kur tensionet me Indinë janë rritur pas sulmit vdekjeprurës të muajit të kaluar ndaj turistëve, në rajonin e Kashmirit. Ushtria pakistaneze tha se raketa e testuar, tokë-tokë, ka një rreze veprimi prej 450 kilometrash. Prova e Sistemit të Armëve Abdali kishte për qëllim të siguronte “gatishmërinë operacionale të trupave dhe të verifikonte parametrat kyç teknikë”, përfshirë sistemin e avancuar të navigimit të raketës dhe aftësitë e manovrimit, theksoi ushtria. Lidhutr me testimet deri më tani nuk ka pasur reagim nga India që ka mobilizuar ushtrinë ndërsa fajëson Pakistanin për sulmin e 22 prillit. Testi ishte i suksesshëm tha presidenti dhe kryeministri i Pakistanit të cilët përgëzuan të gjithë ata që kontribuuan. Pakistani nuk i lëshon raketat drejt kufirit me Indinë dhe zakonisht ato testohen në Detin Arabik ose në shkretëtirat e provincës jugperëndimore të Baloçistanit, shkruan Radio Evropa e Lirë. Rajoni i Kashmirit është i ndarë midis Indisë dhe Pakistanit, por të dyja vendet pretendojnë sovranitet të plotë mbi të.