Pakënaqësia e votuesve gjermanë me koalicionin qeverisës duket se ka arritur një nivel rekord, të paktën këtë e tregon një sondazh i publikuar nga transmetuesi kombëtar ZDF të enjten, pasi të gjitha partitë e koalicionit treguan rezultate të dobëta gjatë zgjedhjeve evropiane javën e kaluar. Nga 1,334 pjesëmarrësit në sondazhin e kryer nga 10 deri më 12 qershor, 71% thanë se ishin të pakënaqur me punën e qeverisë, ndërsa në maj kjo shifër ishte 66 për qind. Rreth 51% e të anketuarve u shprehën në favor të zgjedhjeve të parakohshme, ndërsa 66% ende besojnë se koalicioni do ta cojë deri në fund mandatin e tij. Të tre partitë në koalicionin qeverisës të Gjermanisë pësuan humbje në zgjedhjet parlamentare të BE-së, një tregues i hershëm ky për votën kombëtare, ndërsa Alternativa për Gjermaninë e ekstremit të djathtë, pati fitime të konsiderueshme. Rezultatet për partitë tradicionale si SPD e kancelarit Olaf Scholz tregojnë pakënaqësinë e gjermanëve me rënien e standardeve të jetesës në ekonominë më të madhe të Evropës, pasi qeveria u mor me krizën energjetike të shkaktuar nga konflikti Rusi-Ukrainë dhe pasojat e pandemisë së koronavirusit. Një rezultat edhe më i dobët në zgjedhjet për BE-në bëri që presidenti francez Emmanuel Macron të shpërndante parlamentin dhe të shpallte zgjedhje të parakohshme pasi u la pas nga e djathta ekstreme.