Organizata Botërore e Shëndetësisë ka paralajmëruar se mbi 230,000 viktima të reja nga COVID-19, mund të ndodhin në Evropë deri më 1 dhjetor. Shkalla e të infektuarve po rritet në mbarë botën, pasi varianti Delta është shumë më i transmetueshëm. Infektimet po ndodhin kryesisht në mesin e personave të pavaksinuar dhe në vendet ku masat kundër përhapjes së COVID-19, tashmë janë lehtësuar. Kreu i OBSH-së për Evropën deklaroi se numri i të infektuarve dhe vdekjeve është përsëri në rritje në Evropë, veçanërisht në vendet më të varfra në Ballkan, Kaukaz dhe Azinë Qendrore. "Javën e kaluar, u shënua një rritje prej 11 % e numrit të vdekjeve në rajon, që në bazë të një parashikimi, mund të çojë në 236,000 vdekje në Evropë, deri më 1 dhjetor", tha Kluge. Sipas OBSH-së, vetëm 6% e njerëzve në vendet me të ardhura të ulëta dhe të mesme në Evropë janë plotësisht të vaksinuar dhe disa vende kanë arritur të vaksinojnë vetëm 1 në 10 punonjës shëndetësorë. "Ngecja në marrjen e vaksinave në rajonin tonë është një shqetësim serioz", tha Kluge, duke u bërë thirrje vendeve që të rrisin prodhimin si dhe të ndajnë dozat.