Një senator amerikan nga Kalifornia u nxor me forcë nga një konferencë për shtyp që po mbante shefja e sigurisë së brendshme, e Donald Trump, në përshkallëzimin më të fundit të tensioneve mbi arrestimet kontroverse të emigrantëve. Senatori Alex Padilla u shty dhe u tërhoq zvarrë nga salla e shtypit në një ndërtesë federale në Los Angeles ndërsa përpiqej të pyeste Kristi Noem në lidhje me operacionet që kanë tronditur qytetin e dytë më të madh të Amerikës. "Unë jam Senatori Alex Padilla. Kam pyetje për sekretaren", tha ai ndërsa dy burra u konfrontuan me të para gazetarëve. Pamjet e filmuara nga stafi i Padilla-s, jashtë sallës, treguan senatorin duke u shtrirë përtokë nga agjentë sigurie që mbanin jelekë antiplumb me logot e FBI-së, të cilët më pas e prangosën. Padilla, një nga dy senatorët demokratë që përfaqësojnë Kaliforninë në dhomën e sipërme të Kongresit, nuk bëri rezistencë. Departamenti i Sigurisë Kombëtare pretendoi - pavarësisht provave video, se Padilla kishte "sulmuar" Noem. "Senatori Padilla zgjodhi një teatër politik pa respekt dhe ndërpreu një konferencë shtypi të drejtpërdrejtë pa u identifikuar ose pa e vënë bexhën e sigurisë së Senatit, ndërsa iu hakërrye Sekretares Noem", shkroi Ndihmës Sekretarja Trisha McLaughlin në mediat sociale. Shërbimi sekret mendoi se ai ishte një sulmues dhe oficerët vepruan në mënyrën e duhur”, shtoi ajo. Reagimi i demokratëve ndërkohë ishte i menjëhershëm. Guvernatori i Kalifornisë, Gavin Neësom, e quajti incidentin "skandaloz, diktatorial dhe të turpshëm". "Trump dhe trupat e tij të sulmit janë jashtë kontrollit. Kjo duhet të marrë fund tani", shkroi ai në rrjetet sociale.