Dy adoleshentë braktisën bankat e shkollës, mëngjesin e kësaj të mërkure, duke u përfshirë në një konflikt të dhunshëm, që agravoi deri në përdorimin e mjeteve prerëse. Në hyrje të shkollës që ndodhet në lagjen numër 15 të Durrësit, dy bashkëmoshatarë patën një konflikt banal me njëri tjetrin. Nxënësit e klasave të teta të arsimit të detyrueshëm 9 vjeçar, u zhvendosën jashtë ambjenteve të shkollës, ku konflikti agravoi edhe më tej. Njëri prej 15 vjeçarëve, i identifikuar me inicialet A.Ç, nxorri thikën dhe plagosi bashkëmoshatarin e tij në këmbë. Menjëherë në vendngjarje mbërritën efektivët e policisë si dhe ambulanca për të dhënë ndihmën e parë mjekësore. 15 vjeçari që mbeti i plagosur u dërgua me urgjencë drejt spitalit ku po merr trajtimin e duhur mjekësor. Ndërkohë, autori i ngjarjes u shoqërua drejt komisariatit, ku të pranishëm ishin edhe familjarët e të miturit.