Si rezultat i kontrolleve, të shtuara për parandalimin, evidentimin dhe goditjen e paligjshmërisë, Policia Kufitare ka goditur një tjetër rast të mosdeklarimit të të hollave në kufi. Shërbimet e Policisë Kufitare në Kakavijë kanë kapur një 64 vjeçar nga Himara me 30 mijë euro të padeklaruara Sipas njoftimit të policisë në mëngjesin e kësaj të premteje, në pikën kufitare të Kakavijës, në dalje të vendit në drejtim të Greqisë, kanë ndaluar për kontroll në vijën e dytë, mjetin tip "SUZUKI" me drejtues një 64 vjeç, lindur në Himarë dhe rezident në Greqi. Gjatë kontrollit të ushtruar në automjet, shërbimet e Policisë Kufitare, në bashkëpunim me shërbimet doganore, i gjetën të fshehura në një çantë dore 30 800 euro, të cilat u sekuestruan në cilësinë e provës materiale. Në përfundim të veprimeve të para të kryera 64 vjeçari u procedua penalisht për veprat penale "Mosdeklarimi i të hollave dhe sendeve me vlerë në kufi" dhe "Pastrimi i produkteve të veprës penale ose veprimtarisë kriminale".