Pas tre ditësh të vështira të përfshira nga flakët, situata mëngjesin e së enjtes në fshatrat e Gramshit paraqitet më e qetë. Ulja e temperaturave, dobësimi i erës dhe angazhimi i qindra forcave në terren kanë ndihmuar në përmirësimin e ndjeshëm të situatës. Vatra të izoluara zjarri vijojnë të jenë aktive në zonat e Skënderbegasit dhe Kodovjatit, por po mbahen nën kontroll nga autoritetet, ndërsa operacionet për shuarjen e tyre po zhvillohen ende. Banorët kanë filluar të rikthehen në banesat e tyre, pasi rrugët janë tashmë të hapura dhe nuk përbëjnë më rrezik për jetën. Në vijim, ekipet do të rikthehen në terren për të evidentuar dëmet dhe pritet që së shpejti të publikohen të dhënat paraprake. Paralelisht po ndërmerren masa për groposjen e bagëtive të djegura, në mënyrë që të parandalohet rreziku për përhapjen e ndonjë epidemie. Tre njësi administrative në Gramsh u përfshinë nga zjarret. Në Skënderbegas u dogjën shtatë fshatra, ndërsa i teti Narta u rrezikua por u shpëtua në kohë nga ndërhyrja e autoriteteve. Zjarri në Gramsh regjistroi edhe viktimën e parë në vend, një 80-vjeçar, i cili dyshohet se mund të ketë qenë edhe shkaktari i flakëve.