Dy njësi të forcave Speciale RENEA zbarkuan në Elbasan, me qëllim arrestimin e disa personave të implikuar në disa vrasje, bazuar në dëshminë e të penduarit Nuredin Dumani. Deri më tani janë shoqëruar 10 persona, por në pranga ka rënë edhe Klement Xhaferri, që njihet në qytet si krahu i djathtë i shumë të kërkuarit Talo Çela, që edhe këtë herë duket se është zhdukur. Në fakt, Policia kishte në objektiv të saj Suel dhe Talo Çelën, por asnjë prej tyre nuk është arrestuar. Kontrollet policore janë zhvilluar në banesa të ndryshme, private dhe në pallate. Nuk janë lënë jashtë kontrollit të Policisë edhe disa biznese në Elbasan dhe Peqin. Bëhet me dije se policia vijoi kontrolle për persona, të cilët janë shpallur në kërkim, apo për ata të cilët dyshohet se mund të kenë qenë të përfshirë në ndonjë ngjarje kriminale.