Edhe 200.000 persona të tjerë janë larguar nga veriu i Gazës që nga 5 nëntori, tha Zyra humanitare e Kombeve të Bashkuara, ndërsa forcat izraelite po vazhdojnë përleshjet me luftëtarët e Hamasit rreth spitaleve, ku pacientët, foshnjat dhe punëtorët shëndetësorë kanë mbetur pa energji dhe me pak furnizime. Zyra humanitare e OKB-së, e njohur si OCHA, tha se vetëm një spital në veri është në gjendje që të pranojë pacientë. Të gjitha spitalet e tjera më nuk janë funksionale dhe shumica shërbejnë si vendstrehim, përfshirë edhe spitalin më të madh të Gazës, Shifa, i cili është i rrethuar nga trupat izraelite. Në këtë spital, 36 foshnja janë në rrezik të vdesin pasi nuk ka energji elektrike për furnizimin e inkubatorëve. Izraeli u ka bërë thirrje civilëve që të largohen nga veriu i qytetit të Gazës për në jug. Por, as pjesa jugore nuk është e sigurt, pasi edhe atje Izraeli po kryen sulme ajrore. Vendstrehimet e ngritura nga OKB-ja janë të stërmbushura dhe një tualet mesatarisht është në dispozicion të 160 personave. Në të gjitha vendstrehimet qëndrojnë afro 1.5 milionë palestinez, apo më shumë se dy e treta e popullsisë së Gazës, që janë larguar nga shtëpitë e tyre. Banorët presin me orë të tëra në rradhë për ushqim dhe ujë, ndërsa e gjithë enklava ka mbetur pa karburant. Izraeli ka ndaluar importet e karburanteve që kur nisi lufta, duke thënë se Hamasi i përdor karburantet për qëllime ushtarake.