Operacioni i policisë së kosovës në veri vazhdon ndërkohë që zhvillimet e këtyre ditëve janë vendosur edhe në fokus të mediave ndërkombëtare. Në mënyrë të vecantë, shtypi gjerman, vendos theksin tek rrezikshmëria e situatës në veriun e Kosovës me shumicë serbe. Gazeta "Frankfurter Allgemeine Zeitung" analizon gjakderdhjen në veri të Kosovës në një analizë të Michael Martens me titull "Vuçiç hedh poshtë pjesëmarrjen e Serbisë në trazira". "Versioni i Vuçiçit, që shteti serb nuk ka të bëjë me trazirat bie ndesh me faktin që autorët ishin të armatosur rëndë dhe të mirëorganizuar. Ata kishin madje edhe një automjet të blinduar. Në këto armatime nuk kanë akses civilët në Kosovë, në një kohë që në veri vija e strukturave kriminale dhe shtetërore është shumë e lëvizshme. Që kjo po i bëhet gjithnjë e më e qartë edhe botës jashtë, duket në prononcimin e të ngarkuarit të BE për Politikën e Jashtme, Josep Borrell, që bëri të ditur në platformën X, se BE e dënon "sulmin e neveritshëm kundër efektivëve të policisë ashpërsisht." Kurse gazeta "taz" nën titullin "Problematiku quhet Vuçiç" boton një koment të Erich Rathfelder për shkallëzimin e situatës në Kosovë, në të cilin theksohet, se "Serbia edhe njëherë e ashpërson gjendjen në Ballkan, në Kosovë.