Fëmijët në Shqipëri dhe Kosovë do e fillojnë vitin e ri shkollor me abetare të unifikuar. Librat tashmë janë shtypur dhe janë gati për t’iu dorëzuar fëmijëve që ulen për herë të parë në bangat e shkollës. Shpërndarja në Kosovë ka filluar në disa zona rurale, për të vijuar më pas edhe me shkollat e qyteteve gjatë kësaj fundjave. Ndërkohë në Shqipëri procesi i shpërndarjes së librave pritet të kryhet gjatë javës së parë të shtatorit, duke qenë se viti i ri shkollor fillon në datën 12 shtator. Në Kosovë do të zhvillohet edhe një ceremoni zyrtare, për publikimin e abetares së unifikuar mes dy vendeve. E pranishme do të jetë edhe ministrja e arsimit dhe sportit, Evis Kushi së bashku me homologen e saj Arbërie Nagavci. Abetarja e përbashkët vjen fill pas dakordësisë mes kryeministrit Edi Rama dhe homologut të tij Albin Kurti gjatë mbledhjes së përbashkët të dy qeverive, për të pasur një abetare të unifikuar që do të shpërndahet më pas kudo ku ka shqiptarë. Vitin e kaluar, të gjithë nxënësit nga klasa e parë e deri në klasën e nëntë përfituan tekstet shkollore falas. Pritet që po e njëjta praktikë të ndiqet edhe gjatë këtij viti shkollor për t’u lehtësuar arsimin nëntë vjeçar, nxënësve të të gjitha shkollave në Shqipëri.