Transportimi i emigrantëve të paligjshëm me mjete luksoze nga zonat kufitare me Greqinë është një metodë e re që po përdorin trafikantët. Pas një rasti para disa ditësh ku emigrantët po transportoheshin me një BMW X5, këtë të enjtë policia ka kapur një makinë Range Rover që po transportonte 9 emigrantë nga Lindja e Mesme. Kështu, në vijim të operacionit policor të koduar "Perimetri" një 37 vjeçar, banues në fshatin Vodicë, Berat, u kap në aksin rrugor rural Qafë Plloçë-Qukës, pranë fshatit Golik, duke transportuar me mjetin tip "Range Rover", në drejtim të Tiranës, 9 emigrantë të paligjshëm, të cilëve kundrejt fitimit prej 1000-1200 euro iu kishte premtuar kalimin drejt vendeve të BE-së. 37 vjeçari është arrestuar dhe ndaj tij është ngritur akuza për veprën penale “Ndihma për kalim të paligjshëm të kufijve, kryer në bashkëpunim”.