Tre vajza me shtetësi italiane janë vënë në pranga nga policia, pasi grabitën një argjendari në Vlorë. Sipas policisë së Vlorës, ato arritën të vidhnin një byzylyk të shtrenjtë, duke shpërqëndruar shitësen e argjendarisë. Byzylyku me diamantë ishte shumë I shtrenjtë, ndërsa mungesa e tij u vu në dukje pasi vajzat u larguan nga dyqani. Pronarët e dyqanit, sapo morën njoftimin për një ngjarje të tillë, lajmëruan policinë dhe kërkuan ndihmë për të identifikuar vajzat. Qytetarët që kanë bizneset e tyre pranë argjendarisë, por edhe qytetarë që jetojnë në zonën përreth, arritën që ti identifikonin 3 vajzat. Ato u kapën në portin e Vlorës, në tentativë për tu larguar nga Shqipëria. Hajdutet e bizhuterisë u shoqëruan në komisariat, ku u morën në pyetje nga policia. Ato deklaruan se kishin disa ditë që kishin mbërritur në Shqipëri, më saktë që qëndronin në Vlorë dhe pranuan autorësinë e vjedhjes. Policia po vijon procedurat për të hetuar edhe më thellë këtë çështje.