Emri i deputetit socialist, Rrahman Rraja ndër vite është lakuar kryesisht për ngjarje ku ai vetë nuk ishte i lidhur drejtëpërdrejtë, por familjarë të tij. Jetëshkrimi i Rrajës tregon që nga viti 2000 e deri më sot ai ka qenë në një formë, apo në një tjetër në pushtet në Krujë. E ka nisur si kryetar këshilli i komunës së Niklës në vitin 2000 dhe tre vjet më vonë u zgjodh kryetar i vetë komunës. Këtë post e mbajti deri në vitin 2015 dhe dy vite më vonë u zgjodh deputet në Kuvendin e Shqipërisë. Megjithatë, gjatë 23 viteve politikëbërje deputeti Rraja nuk mbahet mend për fjalimet në Kuvend, as për investimet që ka kryer në Nikël, por për ngjarje ku të implikuar kanë qenë vëllezërit, djemtë apo nipërit e tij, duke filluar nga akuzat për gjobëvënie, dhunën në rastin e Xhisielës, vrasjet me pagesë, e deri te rasti i fundit i dhunimit barbar me shkopinj bejzbolli e pistolete ndaj dy vëllezërve Jashar e Bilbil Maja.