I vetmi organ drejtues në Partinë demokratike zyrtare, që përafrohet më shumë me një qëndrim përbashkues vijon të mbetet grupi parlamentar. Ashtu si edhe në takimet e tjera, Kolegji i kryetarëve ishte i prerë në qëndrimin e tij për të patur zgjedhje në parti, por duke përjashtuar ish-kryeministrin Sali Berisha, edhe pse ky i fundit në bazën e partisë rezulton më i votuari. Në takimin e së mërkurës që zgjati për më shumë se 3 orë, kryetarët e degëve të PD, kërkuan nisjen sa më parë të garës për zgjedhjen e kryetarit, duke konsoliduar edhe më tej ndarjen e partisë. Teksa grupi kërkon që procesi i riorganizimit të nisë nga poshtë lart, kryetarët kanë shënuar edhe datën kur i gjithë ky proces sipas tyre duhet të ketë përfunduar, e cila është 15 korriku. Edhe të pakonfirmuar publikisht, krerët e PD në rrethe mirëpresin rikthimin e Lulzim Bashës, teksa Kolegji i Kryetarëve ka qenë organi i cili që në krye të herës ishte kundër dorëheqjes së tij. Ndërkohë teksa qëndrimi zyrtar i këtyre dy organeve është bërë publik, njëri me platformë e tjetri me ultimatum për zgjedhje, një vendim dhe qëndrim i përafërt me atë të kryetarëve të degëve, pritet edhe nga kryesia, e cila në shumicë është në krah të ish-kryetarit Lulzim Basha. Vetë ky i fundit e ka konfirmuar ndonëse jo ligjërisht, rikthimin e tij, teksa është shprehur se ka frikësuar Edi Ramën, Sali Berishën dhe Ilir Metën.