Nepali bëhet shteti i radhës që ndalon TikTok-un, rrjeti social kinez me arsyetimin se dëmton harmoninë sociale. Vendimi vjen disa ditë pasi vendi prezantoi një rregull të ri që kërkon që platformat e mediave sociale të krijojnë zyra ndërlidhëse në vend. TikTok, i cili ka rreth një miliard përdorues në muaj, është ndaluar nga disa vende, përfshirë Indinë. Në fillim të këtij viti, Montana u bë shteti i parë amerikan që e ndaloi atë plotësisht, ndërsa në SHBA, Britaninë e Madhe dhe vende të tjera perëndimore TikTok është ndaluar të përdoret nga administrata nën frikën e spiunazhit. Më shumë se 1600 raste të krimit kibernetik të lidhura me TikTok janë regjistruar gjatë katër viteve të fundit në Nepal, sipas raporteve të mediave lokale, ndërsa opozita e konsideron vendimin abuziv dhe goditje të shprehjes së lirë.