Ende nuk ka një vendim për ndarjen e Shqipërisë dhe Maqedonisë së Veriut nga procesi për çeljen e negociatave me Bashkimin Europian. Dosja.al ka komunikuar me email me Maria Ruis Nievas, e cila ka lajmëruar se nesër në Këshillin e Çështjeve të Përgjithshme pritet një debat lidhur me çëshjen e dy vendeve të Ballkanit Perëndimor. Deri më tani, qëndrimi i palëve është që dy vendet të jenë bashkë në proces dhe të “ecin” paralelisht, pra edhe Shqipëria të mbetet në vend-numëro nga qëndrimi i Bullgarisë ndaj fqinjëve maqedonas. “Nesër në Këshillin e Çështjeve të Përgjithshme ne presim një debat mbi zgjerimin që do të trajtojë çështje të ndryshme, njëra prej tyre është edhe Shqipëria me Maqedoninë e Veriut. Sidoqoftë është e vështirë në këtë fazë të thuash nëse do të ketë ndonjë vendim konkret. Deri më tani preferenca e përgjithshme e vendeve anëtare ka qenë që të mbahen të dyja së bashku. Por çfarë saktësisht kërkon Bullgaria nga Maqedonia e Veriut? Sipas historiografisë zyrtare bullgare, banorët me origjinë sllave të Maqedonisë së Veriut janë bullgarë dhe flasin bullgarisht, por pësuan ‘lavazh truri’ gjatë regjimit komunist në Jugosllavinë e Titos (1945-91). Kështu u krijua një identitet dhe gjuhë e re “maqedonase”, megjithatë ky pretendim nuk është i ri, por është pozicioni zyrtar i Bullgarisë që nga vitet 1950. Pretendim që pritet t’i kushtojë Shqipërisë. Vetë kryeministri Edi Rama gjatë vizitës së tij në Bullgari u shpreh se nuk dëshironte që të futej në mes dy vendeve mike, ndërsa homologu i tij Strefan Yanev kërkoi dialog mes dy vendeve për zgjidhjen e problemit, por pa ndërhyrjen e palëve të treta.