Një gjykatë në Moskë ka lëshuar një fletarresti për shkrimtarin e njohur rus, Boris Akunin, i cili akuzohet për thirrje për "terrorizëm" dhe shpërndarje të "informacioneve të rreme" për ushtrinë ruse. Akunin njihet ndryshe si Grigory Chkartishvili. “Ndaj Chkartishvilit është dhënë një masë parandaluese paraburgimi për një periudhë prej dy muajsh nga momenti i ndalimit të tij në Rusi ose ekstradimit nga jashtë”, tha gjykata në Basmanny. Muajin e kaluar, Ministria e Brendshme e Rusisë e shpalli Akuninin person në kërkim për aktivitet të dyshuar kriminal, megjithëse nuk përmendi akuza specifike. Akunin, 67 vjeç, që aktualisht jeton në Londër pasi u largua nga Rusia në 2014, ka kritikuar hapur pushtimin e paprovokuar të Ukrainës nga Rusia. Në fillim të këtij muaji, Ministria ruse e Drejtësisë e shpalli Akunin "agjent të huaj", duke vendosur emrin e tij në një listë ndëshkuese që ka në shënjestër kritikët e regjimit. Muajin e kaluar, shërbimi monitorues financiar i Rusisë, shtoi Akunin në listën e "terroristëve dhe ekstremistëve" pa asnjë shpjegim, por raportet e mediave thanë se kishte nisur një hetim kundër tij lidhur me akuzat e diskreditimit të forcave të armatosura ruse. Ky veprim u ndërmor më pak se një javë pasi një nga botuesit më të mëdhenj të librave në Rusi, dhe rrjeti më i madh i librarive në vend, njoftuan se kishin hequr dorë nga shkrimtari Akunin dhe një shkrimtar tjetër, Dmitry Bykov, për shkak të komenteve të tyre pro-ukrainase dhe anti-ruse. Në tetor, të gjitha teatrot ruse që shfaqnin shfaqje të bazuara në veprat e Akuninit, e hoqën emrin e tij nga posterët.