Një 38-vjeçar është vënë në pranga nga Policia e Lushnjës, pasi dyshohet se ka tentuar të blejë votën e një shtetasi në favor të një subjekti politik, pjesëmarrës në zgjedhjet parlamentare të 11 majit 2025. Sipas policisë ky shtetas i kishte premtuar një shtetasi një shumë parash në këmbim të votës së tij, si dhe i kishte marrë kartën e identitetit, në mënyrë të paligjshme. Shërbimet e Komisariatit të Policisë Lushnjë, në bashkëpunim me Prokurorinë e Fierit, kanë ndërhyrë në kohë dhe kanë arrestuar autorin në flagrancë. Në kuadër të hetimeve, është sekuestruar edhe karta e identitetit e shtetasit që ishte objekt i këtij premtimi korruptiv. Ndaj të dyshuarit rëndojnë akuzat për “Korrupsion aktiv në zgjedhje” dhe “Marrje dhe përdorim i paligjshëm i dokumenteve të identifikimit”. Materialet procedurale i janë kaluar SPAK për vijimin e hetimeve.