Prej një muaji Durrësi, është kthyer në kryefjalë për mbetjet urbane. Situata është përkeqësuar aq shumë, sa të krijonte përshtypjen se qyteti bregdetar më shumë ngjante me Kabulin, sesa me një qytet që pret turistë, apo pushues nga brenda vendit. Qindra ton mbetje urbane që derdhen rrugëve, apo lagjeve të qytetit janë pamja që ofrohet përditë. Pika e grumbullimit të mbetjeve urbane në Durrës, prej vitesh e kthyer në një problem serioz tashmë do të jetë një park multifunksional, një zgjidhje e Qeverisë shqiptare për ta kthyer këtë zonë për aksesim jo vetëm nga banorët, por edhe studentët, pasi universiteti ndodhet shumë pranë. Në Porto Romano, mbetjet urbane digjeshin sistematikisht, duke u kthyer në rrezik serioz për qytetin bregdetar. Ky rrezik i grumbullimit të maleve të larta me plehra, që rritej edhe me tepër dhe me sezonin e verës, u kthye në shqetësim për qeverinë.