Sekretari i Përgjithshëm i NATO-s, Jens Stoltenberg, ka hedhur poshtë krahasimet midis ndërhyrjes së Aleances Veri-Atlantike në Kosovë në vitin 1999 dhe situatës aktuale në Ukrainë. Kreu I aleancës thotë se NATO ndërhyri për të ndalur krimet në Kosovë dhe se në kohë Jugosllavia veçse ishte shpërbërë. Reagimi erdhi pasi Stoltenberg u pyet nga gazetarët në Bruksel nëse ndërhyrja e Aleancës më 1999, pa rezolutë të Këshillit të Sigurimit të Kombeve të Bashkuara shkaktoi shpërbërjen e Jugosllavisë. Sulmet ajrore të NATO-s nisën më 24 mars të vitit 1999 dhe zgjatën për 78 ditë. Kjo ndërhyrje i dha fund luftës në Kosovë. Këto komente Stoltenberg i bëri pas një takimi që shtetet anëtare të NATO-s zhvilluan në Bruksel me zyrtarët rusë, pas tensionimit të situatës në Ukrainë.