Pas shqetësimeve të ngritura edhe nga Presidenti Ilir Meta kur ktheu ligjin për gjendjen civile, se shumë qytetarëve u është ndërruar gjendja civile pa kërkesën e tyre duke zhvendosur edhe qendrat e votimit, ministri i Brendshëm, Sandër Lleshaj ka reaguar duke pohuar se se deri më tani nuk ka ardhur asnjë nga ankesë nga qytetarët për lëvizjen nga qendrat e votimit. Nëpërmjet një reagimi në rrjetet sociale, Lleshaj thote se asnjë qytetar nuk mund të lëvizet drejt një adrese të re zgjedhore jashtë vullnetit të tij dhe jashtë përcaktimeve ligjore. “Asnjë pasiguri apo frikë parazgjedhore nuk justifikon përpjekjet për dezinformim të publikut nga aktorët politikë. Që nga fillimi i muajit tetor 2020, janë publikuar 2 ekstrakte të listave zgjedhore, të cilat janë afishuar në të gjitha bashkitë si dhe janë të aksesueshme tek portali e-Albania. Asnjë ankesë konkrete për “lëvizje nga qendrat e votimit” nuk është provuar deri tani. Ata që e kanë bërë vetë dikur këtë gjë dhe tani druhen se mos kjo gjë do të përsëritet nga ne, duhet të jenë të qetë dhe të qartë: ASNJË qytetar nuk mund të lëvizet drejt një adrese të re zgjedhore jashtë vullnetit të tij dhe jashtë përcaktimeve ligjore”, thuhet në postimin e ministrit Lleshaj.