Izraeli ka nisur një ofensivë të madhe ajrore dhe tokësore në qytetin Jenin të Bregut Perëndimor, operacionin e tij më të madh ushtarak në territorin palestinez në dy dekadat e fundit. Ministria e Mbrojtjes dhe shërbimet e inteligjencës vendase thanë se bëhej fjalë për një operacion antiterror, që shënjestronte grupin Brigadat e Jeninit, i mbështetur fort nga Irani. Të paktën tetë palestinezë u vranë dhe 50 u plagosën, 10 në gjendje të rëndë, në sulmin që filloi pas mesnatës, me numrin e të vdekurve që ka gjasa të rritet, sipas ministrisë palestineze të shëndetësisë. Operacioni nisi me bombardimin me 10 dronë dhe më pas me ndërhyrjen tokësore të të paktën 2 mijë trupave në kampin e Jeninit. Një zëdhënës i presidentit palestinez, Mahmud Abbas, e quajti operacionin "një krim të ri lufte kundër popullsisë së pambrojtur".