Policia rrugore ka bërë bilancin e shoferëve të ndëshkuar në një javë në rang vendi. Si rezultat i monitorimit në të gjitha akset rrugore janë pezulluar 129 leje drejtimi, për shpejtësi mbi normat e lejuara, për drejtim të mjetit në efektin e alkoolit dhe për qarkullim në sens të kundërt. Ndërkohë janë arrëstuar 47 drejtues mjetesh, për drejtim mjeti në gjendje të dehur dhe për drejtim të mjetit pa leje drejtimi. Gjithashtu, në të gjithë vendin janë vendosur mbi 31 mijë masa administrative, kryesisht për shpejtësi tej normave të lejuara, për përdorim të celularit, gjatë drejtimit të mjetit, për mospërdorim të rripit të sigurimit, parakalime të gabuara, manovra të rrezikshme në rrugë apo shkelje të tjera të qarkullimit rrugor. Për shkak të fluksit të lëvizjeve,sidomos në zonat bregdetare, gjatë fundjavës, janë shtuar patrullat e lëvizshme, të mbështetura nga patrullat e përgjithshme dhe Forca ‘Shqiponja’, për të lehtësuar qarkullimin. Policia Rrugore apelon për të gjithë drejtuesit e automjeteve dhe motomjeteve, të zbatojnë rregullat e qarkullimit rrugor, për përdorim të rrugëve alternative, për qëndrim në radhë kur ka ngadalësim të lëvizjes së automjeteve në raste fluksi dhe të mos kryejnë parakalime të gabuara apo manovra të rrezikshme në qendrat urbane dhe akset nacionale. Gjithashtu apelohen drejtuesit e kamionëve të zbatojnë kufizimet e lëvizjes, gjatë fundjavës dhe festave zyrtare.