Ndërtesa të shkatërruara, anije të mbytura, rrënoja të shpërndara në portin e Mariupolit, janë kujtesa e një rrethimi të gjatë të qytetit ukrainas, që kohët e fundit ra në duart e Rusisë. Pas afro dy muajsh, luftimet në qytetin e rrëniar dhe portin e tij strategjik, në pjesën më të madhe janë ndalur, por gjëmime shpërthimesh vazhdojnë të dëgjohen nga uzina e celikut Azovstal, bastioni i fundit i forcave ukrainase në qytet. Presidenti rus, Vladimir Putin, urdhëroi javën e shkuar izolimin e uzinës ku disa qindra ushtarë ukrainas dhe civilë mbeten të bllokuar në një labirinth tunelesh nëntokësore të erës sovjetike, përfshirë edhe shumë persona që kërkojnë kujdes mjekësor. Nga porti i Mariupolit, reporterët e agjencisë franceze të lajmeve, AFP, dëgjuan shpërthimet e forta nga Azovstali gjatë një vizite të gazetarëve organizuar nga ushtria ruse. Pasditen e të premtes, shpërthimet ndodhnin në pak sekonda distancë, disa më të fuqishëm se të tjerët, ndërsa tym gri ngrihej në qiellin mbi zonën e madhe industriale.