Shtetet e Bashkuara dhe Koreja e Jugut kanë rënë dakord për një plan pesëvjeçar për ndarjen e kostos së mbajtjes të trupave amerikane në Korenë e Jugut, tha ministria e Jashtme në Seul dhe Departamenti amerikan i Shtetit. Për vitin 2026, të dy vendet janë pajtuar që të rrisin shpenzimet e mbrojtjes me 8.3 për qind, për ta cuar totalin në 1.1 miliard dollarë, tha Ministria e Jashtme e Koresë së Jugut. Seuli dhe Uashingtoni nisën më herët bisedimet për këtë çështje, në atë që u pa si një përpjekje për të arritur dakordësi për këtë plan para zgjedhjeve presidenciale në SHBA. Koreja e Jugut dhe SHBA-ja arritën marrëveshje për planin e ri të shpenzimeve pas tetë raundesh bisedime që nisën në prill, ndërsa marrëveshja ekzistuese ishte parashikuar të skadonte vitin e ardhshëm. Afro 28.500 trupa amerikane janë të vendosura në Korenë e Jugut, si pjesë e përpjekjeve për të frenuar Korenë e Veriut, të pajisur me armë bërthamore. Koreja e Jugut nisi të ndante koston e dislokimeve amerikane në fillim të viteve ’90. Donald Trump, kandidati republikan për zgjedhjet e nëntorit, në kohën kur ishte president i SHBA-së, kishte akuzuar Korenë e Jugut se nuk po paguan sa duhet për mbrojtjen amerikane, duke kërkuar që të vendi të paguante nga 5 miliardë euro në vit për dislokimet amerikane. Gjatë administratës Trump nuk kishte pasur përparim në këtë drejtim. Por, pasardhësi i tij, Joe Biden, arriti një marrëveshje dhe Seuli ra dakord të rrisë kontributin me 13.9 për qind.