Komisioni Qendror i Zgjedhjeve ka shpërndarë këtë të martë fondet për fushatën zgjedhore të 14 majit. Nga fondi prej 96 milion lekë kanë përfituar Partia Socialiste afërsisht 43 milionë Lekë, e dyta renditet Partia Demokratike afro 25 milionë Lekë dhe Partia e Lirisë afro 16 milionë Lekë. Partia Demokratike zyrtare me kryetarin e autorizuar Enkelejd Alibeaj është partia opozitare që ka përftuar më shumë para, pavarësisht se në këto zgjedhje garon vetëm për 14 bashki. Nga shuma fillestare, KQZ ka marrë edhe borxhin e kësaj force politike prej 600 mijë lekësh. Ndërsa në arkën e Partisë së Lirisë do të shkojë edhe fondi i vënë në dispozicion për Partinë Demokristiane të Nard Ndokës, që në këto vendore shkon në koalicion. Komisioneri Shtetëror i Zgjedhjeve ka firmosur dhe një akt-marrëveshje me subjektet përfituese të cilat në rast se nuk bëjnë transparente çdo shpenzim do të humbasin të drejtën për të përfituar nga fondet e buxhetit të shtetit për 5 vite ose duhet të kthejnë të gjithë shumën duke paguar dhe sanksionet që përcakton ligji elektoral. Ai që mbeti pa para në këtë fushatë, edhe pse bën takime e mitingje, me para burimi i të cilave është mister, është ish-kryeministri Sali Berisha. Nga koalicioni ku ai ka futur kandidatët e tij për kryebashkiakë, “Bashkë Fitojmë” i vetmi që mori para është Ilir Meta me Partinë e Lirisë.