Ministria e Industrisë dhe Tregtisë në Kosovë, ka vendosur të marrë masa mbrojtëse për produktet e derivateve të naftës. Sipas këtij vendimi, marzhini tregtar maksimal i lejuar, për shitjen me shumicë, është dy centë për litër, kurse çmimi maksimal i lejuar i shitjes me pakicë 12 centë për litër naftë. Në arsyetimin e këtij vendimi, thuhet se “Ministria ka monitoruar tregun e produkteve të naftës dhe çmimet e furnizimit nga importi. Në bazë të raportit të Inspektoratit të Tregut, është evidentuar mospërputhje e çmimeve në Kosovë në krahasim me lëvizjet në tregjet botërore”. “Kjo përbën shkas për rregullimin e çmimeve dhe caktimin e masave të tjera mbrojtëse”, thuhet në vendim. Ky vendim do të jetë në fuqi për 30 ditë. Aktualisht, në tregun e Kosovës, një litër naftë kushton deri në 1.80 euro, kurse një litër benzinë deri në 1.50 euro.