Elon Musk thotë se Nigel Farage duhet të japë dorëheqjen si lider i partisë së krahut të djathtë të Britanisë së Madhe, ‘Reforma’, në një tërheqje të menjëhershme të mbështetjes nga miliarderi amerikan për aktivistin e Brexit-it, i cili po përpiqet të shkundë sërish establishmentin politik britanik. "Partia e Reformës ka nevojë për një udhëheqës të ri. Farage nuk ka atë që i duhet për të drejtuar partinë", tha Musk në platformën e tij të mediave sociale X të dielën, disa orë pasi Farage e kishte cilësuar atë si një mik që e bëri Reformën të dukej mirë. Musk, një aleat i ngushtë i Presidentit të zgjedhur të SHBA-së, Donald Trump, e kishte mbështetur Farage dhe kishte pozuar për një fotografi me të muajin e kaluar. Reforma fitoi 4.1 milionë vota ose 14% të totalit dhe pesë vende në parlament në zgjedhjet kombëtare të korrikut të kaluar. Farage ka thënë më herët se është në negociata me Musk për donacione nga ana e miliarderit që do ta ndihmonin atë të sfidonte partitë dominuese në britani, atë laburiste dhe Konservatore.