Ministri i Brendshëm i Kosovës, Xhelal Sveçla ka thënë më 23 qershor se “është parandaluar një sulm terrorist”, falë angazhimit intensiv të njësiteve speciale të Policisë së Kosovës. Sipas tij, rreth 100 metra nga komuna e Zveçanit është identifikuar një veturë me targa të Beogradit, e cila ka pasur sasi të mëdha armësh, mjete shpërthyese dhe municione. Drejtori i Zyrës për Kosovën në Qeverinë e Serbisë, Petar Petkoviç, ka reaguar të shtunën dhe ka akuzuar autoritetet e Kosovës se i kanë “mbjellë” armët e gjetura në aksionin në veri të Kosovës, një ditë më parë. Në një konferencë për media, Petkoviç ka thënë se armët, të cilat Policia e Kosovës i ka gjetur në afërsi të Komunës së Zveçanit, janë konfiskuar më herët në aksionet për çarmatimin e qytetarëve në Kosovë. Petkoviç deklaroi se ka njoftuar autoritetet ndërkombëtare në lidhje me planet e Kosovës për të arrestuar të tjerë serbë në veri dhe se historia e unicioneve të kapura në Zveçan është thjesht për të justifikuar arrestimet. Në të njëjtën kohë, ai deklaroi se për çështjen e municioneve të kapura në Zveçan do të japë nëj deklaratë brenda 24 orëve të ardhshme, edhe vetë presidenti serb Aleksander Vucic.