Prej fillimit të qershorit e çdo ditë deri tani deri tani, rastet e infektimeve të reja me koronavirus numërohen me gishtat e njërës dorë e po kështu edhe viktimat. Këto shifra tregojnë se vera do të jetë e qetë, por ende nuk ka asnjë qëndrim të ekspertëve, nëse pritet apo jo ndonjë valë tjetër në shtator. Gjithsesi, situata e tanishme është e stabilizuar. Edhe situata në spitale paraqitet normale dhe prej kohësh numri i pacientëve që marrin trajtim spitalor është ulur. Edhe këtë të enjte nuk është regjistruar asnjë humbje jete gjatë 24 orëve të fundit. Ministria e Shëndetësisë ka bërë me dije se në 24 orët e fundit janë kryer 2803 testime, nga të cilat vetëm dy qytetarë kanë rezultuar pozitivë me koronavirus. Rastet e konfirmuara janë identifikuar, një rast në Tiranë dhe një rast në Vaun e Dejës. Po në harkun kohor të 24 orëve të fundit janë shëruar 11 qytetarë, duke e çuar numrin e të shëruarve në 129 mijë e 966 që nga fillimi i epidemisë. Ndërkohë, vetëm 3 paceintë po marrin trajtim spitalor të specializuar, ku njëri prej tyre është në terapi intensive. Aktualisht janë vetëm 78 pacientë ende aktivë me Covid 19 në vendin tonë.