Top News ka siguruar videon e momentit të ekzekutimit, Klaudio Prendit, djalit të ish gjyqtarit të Gjykatës së Krimeve të Rënda, Fran Prendi, pak pas mesnatës së 18 nëntorit në rrugën “Xhanfize Keko”. Sipas pamjeve të kapura nga kamerat e sigurisë, atentatorët kanë pritur momentin që Klaudio Prendi të dilte nga bar-kafeja, dhe sapo futet në makinë, autorët e vrasjes janë afruar me makinën tip ‘Audi’, paralel me makinën e viktimës, dhe kanë qëlluar drejt tij. Sipas dëshmisë së shokëve të Prendit, të cilët rezultojnë të jenë efektivë policie, me të cilët ishte me ta pak minuta para ekzekutimit, Prendi nuk kishte shfaqur asnjë shenjë shqetësimi si dhe nuk kishte treguar asnjë probem. Ishin këta të fundit që e dërguan në spital, por fatkeqësisht i riu nuk mbijetoi dot. Shokët e viktimës kanë deklaruar se kanë qëndruar së bashku për rreth dy orë në një bar kafe, ku më pas kanë lëvizur në drejtime të ndryshme, duke mos parë asgjë. Autorët dyshohet se kanë përdorur armë me silenaciator, pasi nuk janë dëgjuar të shtëna nga banorët. Pak pas ngjarjes së rëndë policia gjeti një makinë me targa të huaja tip “Audi” që digjej në zonën e Farkës. Gjatë kontrollit të makinës qe u dogj në Farkë, efektivët kanë gjetur edhe armën e llojit pistoletë. Grupi i hetimit ka disa pista të cilat po i heton.