Kryeministri hungarez Viktor Orban i kërkoi presidentit ukrainas Volodymyr Zelenskiy të martën të shqyrtojë mundësinë e një armëpushimi me qëllim që të përshpejtohet përfundimi i luftës me Rusinë dhe gjithashtu tha se dëshiron një marrëveshje të gjerë bashkëpunimi me Kievin. Orban, i cili është një kritik i hapur i ndihmës ushtarake perëndimore për Ukrainën dhe ka marrëdhëniet më të ngrohta me presidentin rus Vladimir Putin se çdo lider tjetër në BE, zhvilloi bisedime me Zelenskin gjatë udhëtimit të tij të parë në Kiev në më shumë se një dekadë. Në deklaratat e shkurtra për gazetarët pas bisedimeve, Orban tha se vlerësonte shtytjen e Kievit për të promovuar vizionin e Zelenskit për paqen në një samit ndërkombëtar në maj në Zvicër dhe synimin e tij për të mbajtur një samit të dytë, më vonë këtë vit. “I kërkova presidentit të mendohet nëse ne mund ta përmbysim rtrjedhën dhe të përshpejtojmë bisedimet e paqes duke bërë fillimisht një armëpushim”, tha Orban. "Një armëpushim, me një afat të caktuar, do të jepte një shans për të përshpejtuar bisedimet e paqes. E diskutova këtë mundësi me presidentin dhe jam mirënjohës për përgjigjet dhe vlerësimet e tij të sinqerta".