Një operacion i përbashkët mes SHBA dhe Australisë shkatërroi një rrjet ndërkombëtar trafiku droge ku u kapën 2.4 tonë kokainë në bordin e një anijeje në brigjet e Amerikës së Jugut që kishte destinacion Australinë. Kokaina, e lidhur me një kartel meksikan droge do të kapte në treg një vlerë prej 700 milionë dollarësh, ose gati sa gjysma e konsumit vjetor të Australisë. Dymbëdhjetë të dyshuar janë arrestuar, thanë autoritetet australiane në një deklaratë të shtunën, duke lëshuar detaje për herë të parë të një operacioni që filloi nëntorin e kaluar kur Administrata Amerikane e Zbatimit të Drogës përgjoi anijen. Gjatë operacionit që ka zgjatur për muaj me radhë, autoritetet australiane konfiskuan kokainën duke e zëvendësuar atë me miell dhe më pas gjurmuan ngarkesën e rreme për të identifikuar porositësit dhe autorët e trafikut. Kjo është sasia më e madhe e drogës e kapur ndonjëherë nga autoritetet australiane, ndërsa në brigjet franceze, 2 tonë kokainë u peshkuan nga peshkatarët rastësisht. Droga dyshohet se është hedhur në det nga grupet e trafikut që mund të jenë ndjerë të kërcënuar nga policia.