Kryeministri grek Qiriako Micotaqis ka reaguar pas situatës kritike në shumë pjesë të vendit, si pasojë e zjarreve që po kërcënojnë edhe jetën e banorëve. Ai tha se autoritetet po bëjnë të gjitha përpjekjet e mundshme për të mbrojtur jetët e njerëzve, përfshirë këtu edhe turistët e huaj që po evakuohen në vendbanime dhe njësi të tjera hoteliere. “Megjithë avancimin e zjarrit, asnjë jetë nuk humbi, kjo tregon se pavarësisht tërbimit të natyrës, asnjë masë nuk do të mjaftojë kurrë. Kjo verë na gjen me temperatura jo të zakonshme, erëra të forta. Në Rodos zjarret vazhdojnë të përhapen në fronte të reja. Dhjetëra e mijëra njerëz janë transportuar në mënyrë të organizuar dhe në kohë në vende të sigurta. I jemi mirënjohës zjarrfikësve, mbrojtjes civile, forcave të armatosura, policisë, vullnetarëve për vetëflijimin e tyre. Për javët e ardhshme ne duhet të jemi në gatishmëri të vazhdueshme. Jemi në luftë me zjarret”, tha kryeministri.