Në seancën e kësaj te premte në kuadër të dosjes ‘Metamorfoza’, avokati Ylli Manjani që përfaqëson në këtë proces Pëllumb Gjokën, kërkoi kohë të parashtrojë kërkesat paraprake, për këtë arsye kërkoi shtyrje të seancës në një datë tjetër. Të njëjtën kërkesë bëri edhe avokati Elton Hyseni, i cili kërkoi kohë të bëjë kërkesat paraprake për pavlefshmëri dhe papërdorshmëri të akteve hetimore. Edhe avokati kryesisht mbajti të njëjtën qëndrim, lidhur me analizimin e ekstrakteve. Prokuroria që në këtë proces përfaqësohet nga Bledar Maksuti dhe Arben Kraja, kërkoi pezullimin e afateve të paraburgimit per të gjithë të pandehurit, për shkak të kërkesave të pabazuara të avokatëve. Gjykata e Posaçme pezulloi afatet e paraburgimit duke shtyrë seancën për në datë 6 tetor ora 14.30. Në këtë proces po gjykohen Pëllumb Gjoka, Behar Brajoviq dhe Edmond Preka pasi kanë akuza për vepra më të renda penale se pjesa tjetër e grupit. Këta të tre bashkë me Oltion Bistrin, Xhevahir Litën, Ardit Hasanbegaj dhe Astmer Bilali po gjykohen po ashtu në një proces paralel po në të njëjtën gjykatë.