Për rreth dy orë ish presidenti Ilir Meta dëshmoi për prokurorin Alfred Shehu në cilësinë e personit që ka dijeni për dosjen 21 janari. Meta u transferua nga paraburgimi i 313 drejt godinës së SPAK përmes tunelit të nëntokësor që lidh dy institucionet. Ish presidenti që mbahet në burg prej tetorit 2024, i dyshuar për korrupsion, pastrim parash dhe fshehje pasurie u vetëofrua të japë informacione të dobishme për demonstratën e dhunshme ku mbetën të vrarë 4 protestues dhe të plagosur 6 të tjerë. Për prokurorin Shehu, mësohet se Meta ka dëshmuar se amerikanët dhe shërbimet inteligjente ishin në dijeni të skenarit të dhunshëm të organizuar nga Edi Rama, për të pasur viktima më 21 janar. Lidhur me provat që ai disponon, ish presidenti orientoi organin hetues të kryejë kontrolle dhe të sekuestrojë materialet që ndodhen pranë institucioneve përkatëse dhe që konsiderohen të klasifikuara.